Un accidente no que se viron implicados cinco vehículos provocou importantes retencións este serán na CG-1.5, ao seu paso polo municipio de Rois. O sinistro ocorreu entre os quilómetros 17 e 18, na zona de Urdilde, e obrigou a cortar a vía en ambos sentidos en dirección Noia.
O 112 Galicia recibiu a primeira chamada arredor das 18:30 horas. Nese momento, un particular informaba dunha colisión entre dous vehículos, aínda que, poucos minutos despois, novas comunicacións confirmaban que finalmente eran cinco os turismos implicados.
Desde a sala de operacións do 112 Galicia informáronse a efectivos do GES de Brión, dos Bombeiros de Boiro, da Garda Civil de Tráfico e de Protección Civil.
Ademais, nun dos vehículos viaxaba un bebé que, por precaución, foi atendido polo persoal sanitario, motivo polo que tamén se solicitou a intervención do Servizo de Urxencias Sanitarias de Galicia-061.
