O BNG de Boiro emitiu un comunicado no que sostén que o Goberno local “incumpriu o acordo plenario para o arranxo do Campo de Bealo un ano despois da súa aprobación. O proxecto, lembran, foi aprobado no seu día por unanimidade. Incluía o arranxo da dita instalación deportivo e tramitar a correspondente solicitude de financiamento diante da Deputación da Coruña.
A voceira nacionalista en Boiro, Raquel Suárez, sinalou que “o arranxo deste campo é unha necesidade real para os clubs e para a veciñanza de Bealo”, lembrando que nas instalacións desenvolven a súa actividade tanto o Club Deportivo Galicia Bealo como o Galicia Bealo Lorchos de fútbol gaélico.
A portavoz do BNG explicou ademais que “ante a falta de movementos por parte do Executivo local”, o Bloque volveu rexistrar no mes de setembro unha solicitude no Concello para instar ao Goberno municipal a cumprir o acordo aprobado en pleno.
Pola súa parte, Mino Álvarez, responsábel do Galicia Bealo Lorchos de fútbol gaélico, explicou as dificultades que afronta a entidade pola situación actual do
campo. “Temos equipos masculino e feminino e queremos xogar neste campo, pero non é posíbel porque o regulamento do fútbol gaélico esixe ter céspede”,
sinalou, ao tempo que lamentou que “o club se vexa obrigado a desprazarse a outras localidades para disputar competicións e mesmo para organizar eventos deportivos”. E engadiu: “Levamos tres anos organizando a Copa Galega de Fútbol Gaélico, que move entre 300 e 400 persoas, e tivemos que levala para Ribeira porque en Boiro non podemos albergar un torneo destas características. A falta de interese do Concello fainos emigrar”, afirmou.
Tamén interveu David Rodríguez, presidente do Galicia Bealo, quen dixo que “a entidade é o segundo club de Boiro con máis equipos federados da Federación Galega de Fútbol”. Rodríguez explicou que a demanda do céspede artificial “leva moitos anos sobre a mesa” e que o club pensaba que o acordo plenario do pasado ano “ía ser o paso definitivo”.
Lembrou que o club xa conseguiu o acordo da comunidade de montes para facer a cesión ao Concello e que o proxecto conta co apoio da Federación
Galega de Fútbol, que ve o enorme potencial destas instalacións.
Desde o ámbito provincial, a deputada do BNG Sol Agra explicou que a solicitude de subvención nominativa para financiar o arranxo do campo “segue sen
tramitarse na Deputación”. Segundo indicou, o pleno do Concello aprobou hai xa un ano solicitar esta subvención, pero, dixo, “a documentación e a tramitación necesarias aínda non foron realizadas polo Goberno municipal”.
