José Luis Rodríguez Zapatero é o primeiro expresidente do Goberno español imputado xudicialmente, acusado de organización criminal, tráfico de influencias e falsificación documental. Sen embargo o xurista galego que fora fiscal do Tribunal Supremo español José Antonio Martín Pallín, en relación con esta imputación e o caso da aeroliña “Plus Ultra” -rescatada mediante un préstamo polo Goberno español de 53 millóns de euros- non percibe “actividades delictivas” nesta operación, segundo manifestou no programa “24 horas” de TVE. No rescate citado tamén aparecen as compañías aéreas “Air Europa” (cun crédito de 475 millóns de euros), “Air Nostrum” (111 millóns) e “Volotea” (200 millóns de euros). Asimesmo foi aprobado no ano 2021 o rescate da compañía “Ávoris” por 320 millóns de euros. Destes préstamos non se fai mención na denuncia presentada polo sindicato “Manos Limpias”.
A sentenza do Tribunal de Xustiza da Unión Europea ratificou a decisión da Comisión Europea que afecta a tódalas aeroliñas de Europa. Outros estados membros da UE fixeron o mesmo que España ao abeiro da sentenza do antedito Tribunal de Xustiza da Unión.
O eido da xurisprudencia, xunto con partidos coma o PP e VOX, son os que, en España, manteñen as reaccións e valoracións á imputación de Rodríguez Zapatero no devandito caso “Plus Ultra”.
Fronte ao dito por José María Aznar sobre “O que poda facer, que faga”, Núñez Feijoo manifestou este mércores en sede parlamentaria que “o que poda roubar, que roube”, ante o apoio expreso do presidente do Goberno, Pedro Sánchez, a Zapatero.
Sánchez desbota o adianto electoral que reclama a oposición, especialmente o PP, que da por feito que, de non ser polo Consello de Ministros, Zapatero “non podería delinquir”, adiantándose deste xeito ao veredicto xudicial.
