Os locais sociais de Lesende e de Vilacova acolleron na tarde deste martes 19 de maio cadansúa presentación do Proxecto Zernadas’27, que o Concello de Lousame está a realizar por todo o municipio para promover a candidatura de Diego Antonio Zernadas de Castro ao Día das Letras Galegas de 2027, coincidindo co 250 aniversario do seu pasamento. Deste xeito, tan só quedará San Xusto para completar o municipio, algo que ocorrerá o próximo luns 25 de maio, ás 19:30 horas.
O alcalde de Lousame, Esteban Ares García, salientou o acto do pasado 17 de maio en Fruíme, “onde tivemos a centos de persoas das sete parroquias reclamando o mesmo. E é algo moi bonito que todo un pobo se reúne arredor da súa cultura e reclame esta candidatura á Real Academia Galega para que nos fagan caso. Sabemos que é un labor moi difícil, en primeiro lugar porque somos un concello moi pequeno e rural”.
Tras presentar as razóns polas que o cura de Fruíme merece ser honrado cun Día das Letras Galegas, Ares García explicou que “puxemos sobre a mesa todo o que tiñamos e consideramos que xa é un gran éxito que o nome de Zernadas vaia estar no debate final. Despois xa dependerá dos académicos e as súas decisións. Pero, pase o que pase, o que temos claro é que Lousame vai conmemorar como se merece o 250 aniversario do pasamento do cura de Fruíme”.
Pola súa banda, o técnico municipal de Cultura, Eduardo Agraso, presentou á veciñanza as distintas iniciativas realizadas polo Concello de Lousame, en colaboración coa AAVV Cernadas de Castro de Fruíme, para poñer en valor a vida e obra de Zernadas de Castro.
Ademais proxectouse o vídeo elaborado polo realizador Luís Avilés para promover a candidatura de Zernadas de Castro. A sesión rematou con todos os presentes sumándose á campaña promocional que o Concello de Lousame ten en marcha en redes sociais co cancelo #EuConZernadas, primeiro en grupo e moitos deles tamén de forma individual. O Concello agasallou aos presentes cun libro de Zernadas de Castro.
