A Asociación Rianxeira de Empresas (ARE) está a incendiar as redes sociais cunha nova campaña viral presentada baixo o lema En Rianxo non hai nada destinada a xerar debate sobre o presente e o futuro da vila e da súa contorna e sobre o papel que xogan veciñanza, administracións e empresas no destino rianxeiro: un papel que será máis positivo canto máis colaboración haxa e canto máis se asente e fortaleza a necesidade de traballar en clave de proximidade. Segundo confirmou a ARE, a peza viralizouse en cuestión de horas acumulando centos de interaccións e compartidos nas redes sociais.
A frase
A ARE escolleu o lema En Rianxo non hai nada porque é “unha frase escoitada durante anos no municipio e que agora se converteu nunha das publicacións máis comentadas das redes sociais da Asociación Rianxeira de Empresas (ARE)”.
A peza, difundida pola entidade este venres 15 de maio, viralizouse en cuestión de horas acumulando centos de gústame nas redes, comentarios e compartidos, ademais de provocar reaccións de veciños, comerciantes e entidades locais.
A publicación parte dunha realidade coñecida por boa parte da veciñanza: comentarios como “vou mercar a Boiro”, “en Rianxo non hai ambiente” ou “aquí non hai nada” . A partir desa idea, a ARE busca facer reflexionar sobre como os hábitos de consumo tamén inflúen na vida dos pobos, no movemento das rúas e na supervivencia do comercio local. Detrás da idea atópase Carla da Silva, publicista e responsábel de comunicación da ARE, quen apostou por utilizar unha das frases máis repetidas no municipio para xerar impacto emocional e abrir conversas arredor do futuro do comercio local. “Sabía que era unha frase que podía calar na xente porque, se algo caracteriza aos rianxeiros e rianxeiras, é que defendemos o noso” , explica Carla.
A peza
A peza utiliza imaxes de negocios pechados recreadas dixitalmente —os establecementos continúan abertos— para representar visualmente como sería un Rianxo sen comercio, sen movemento e sen vida nas rúas. A publicación remata cunha mensaxe directa: Rianxo vive se TI decides quedarte. A repercusión foi tal que diferentes entidades locais tamén se sumaron á conversa. Entre elas, o Festival Rock in Rian destacou nas redes sociais que boa parte da vida cultural e da programación do municipio sería imposíbel sen o apoio do tecido empresarial local.
Desde a ARE sinalan que o obxectivo da publicación non é xerar polémica, senón poñer sobre a mesa unha realidade: detrás de cada negocio local hai persoas apostando cada día por manter vivo o pobo.
Podemos ver a campaña no Facebook da ARE, e tamén no Instagram.
