A “Pequena” Romaría de Exipto, organizada pola Comisión de Festas de Abanqueiro en colaboración co CEIPP de Abanqueiro, celebrouse esta mañá cunha ampla participación de alumnado, familias e profesorado nunha xornada dedicada a achegar às novas xeracións a historia e a tradición dunha das celebracións máis emblemáticas da parroquia.
Ao longo da mañá, o alumnado participou en obradoiros sobre cultura popular galega e sobre os elementos propios da Romaría de Exipto. Un dos momentos máis salientables foi a charla de Quin, que explicou ás crianzas a orixe e a evolución da romaría, poñendo en valor a súa importancia histórica e social tras máis de cen anos de existencia.
Tamén se impartiu un obradoiro de baile tradicional galego a cargo de Conchi Carro, onde os nenos e nenas aprenderon pasos e ritmos do folclore local de forma participativa e lúdica. A programación completouse coa presentación dun concurso de debuxos sobre a Romaría de Exipto, promovido coa colaboración do programa de RSC We Sea de Jealsa; os escolares dispoñen dos vindeiros días para entregar os seus traballos. Os debuxos gañadores formarán parte da próxima Folla Parroquial da Romaría de Exipto, que se editará durante a festa na primeira fin de semana de agosto, e todos os traballos quedarán expostos no Monte de Exipto durante esas datas.
A xornada rematou cunha merenda para todos os asistentes, con empanadas doadas por Chicolino e froita cedida por Mi Frutería, un exemplo do apoio do tecido empresarial local ás iniciativas da Comisión de Festas. Desde a organización agradecéronse a implicación do CEIPP de Abanqueiro, do profesorado, das familias e das persoas colaboradoras, así como o patrocinio das empresas participantes e o labor das persoas encargadas dos obradoiros.
A Comisión de Festas de Exipto continúa co programa de actividades previas á romaría, entre as que figura a Foliada de Exipto, que se celebrará o 30 de maio no Centro Social de Abanqueiro a partir das 19.30 horas.
