A Asociación de Empresarios de Ribeira, AER, emitiu a través do seu presidente, Francisco Martínez Gude, un comunicado sobre o proxecto do novo polígono industrial de Pedras Vermellas no que mostran a súa preocupación polo estado no que se atopa o desenvolvemento do proxecto. No escrito din reflectir a inquietude de “moitos dos nosos asociados, que tanto tempo levan agardando polo polígono” e solicitan á Xunta de Galicia a “maior dilixencia para comezar a súa continuación”.
E sinalan: “Ante a gran dificultade económica que esta obra implica e unha vez tomada a decisión por parte do Concello, de pasar á Xunta de Galicia a continuidade do proxecto, solicitamos desta que, fiel á palabra dada a membros da nosa directiva nos moitos encontros de traballo que sobre este asunto mantivemos con diferentes altos cargos da administración, a Administración autonómica axilice os traballos para proceder á licitación e dar continuidade ao proxecto”. Segundo indican os empresarios, “Ribeira leva moito anos esperando por este polígono, demasiado tempo, non podemos soportar máis a deslocalización das nosas empresas ao mesmo tempo que perder a oportunidade de que as empresas foráneas se asenten no noso municipio”.
No comunicado indican que “polo traballo realizado ata o de agora, polo apoio dos nosos empresarios interesados en obter terreos nos que implantar os seus proxectos empresariais para o desenvolvemento da nosa cidade, para obter os postos de traballo que os nosos fillos necesitan para o seu futuro, pedimos á nosa alcaldesa non se deteña no seu empeño de loitar para que a obra non se estanque, ao mesmo tempo requirimos da Xunta cumpra coa súa palabra dada a esta Asociación e poña da seu parte a axilización deste proxecto para que a burocracia non a teña parada nas teas de araña da administración”.
