O vindeiro domingo 24 de maio ás 10.00 h celebrarase no concello de Rianxo a I Andaina Solidaria “Camiños de Ouro. O paraíso existe”, unha experiencia para desfrutar camiñando entre mar e terra, descubrindo recunchos únicos do concello rianxeiro e, segundo avanzou a organización (Cruz Vermella), “compartindo sorrisos, natureza e momentos que quedan para sempre”.
Trátase “dun percorrido pensado para gozar do entorno, respirar tranquilidade e sentir a maxia dos camiños que fan de Rianxo un lugar especial”. Quen queira facer a súa inscrición pode facela xa en liña. Será “unha xornada chea de vida, convivencia e solidariedade”.
Organiza a Cruz Vermella local. Ao remate haberá agasallos doados polo comercio local.
O recadado a través das inscricións permitirá á Cruz Vermella dispor de recursos para dar resposta ás necesidades das persoas do Barbanza nas áreas de inclusión, emprego, saúde ou educación.
“Coa participación na andaina, ademais de realizar unha actividade comunitaria, saudábel e lúdica, estaremos facendo posíbel que a Cruz Vermella que as persoas en situación de vulnerabilidade da nosa contorna sexan atendidas. Ademais, de ter a oportunidade de gañar 3.000.000 € co boleto do Sorteo do Ouro que recibirás como agasallo pola túa inscrición”, indican dende a organización.
