O Concello de Boiro convoca unha nova edición das bolsas a deportistas federados do municipio, unha liña de axudas dotadas de 9.750 euros. O prazo de solicitudes abrirá este venres 8 de maio e por un prazo de dez días hábiles.
Esta liña de axudas forma parte das distintas accións que o Concello de Boiro leva a cabo para a promoción do deporte e ten como obxectivo “recoñecer o esforzo e dedicación que leva aparellada a práctica deportiva de moitos dos deportistas do municipio para progresar nas súas respectivas modalidades”.
Para poder participar desta convocatoria será requisito estar empadroado; ter entre 9 e 23 anos a data do 31 de decembro de 2025; dispoñer de licencia federativa en vigor; ter participado na tempada precedente en campionatos oficiais galegos, españois ou de nivel superior, convocatorias das seleccións galega ou española, probas oficiais de nivel competitivo igual ou superior aos campionatos galegos ou campionatos oficiais absolutos de liga da 1ª, 2ª e 3ª categoría de cada especialidade; e non sufrir sanción ou descualificación por comportamento antideportivo.
As bases da convocatoria e toda a información sobre o proceso están dispoñíbeis na web municipal.
