O vindeiro 21 de maio comezan en Nebra (O Porto do Son) as Festas de Santa Rita, que este ano redobra a súa posta pola troula e o baile e a música tradicional e popular.
Os festexos arrincan o 21 de maio, Día do Cruceiro de Tores, a primeira hora con alboradas a cargo das Pandereteiras Falcoeira, que darán paso a unha misa solemne ás 12.00 horas e a unha sesión vermú a cargo do Dúo Aires de Broña. Polo serán, ás 19.00 horas, no Cruceiro de Tores celebrarase un concerto de Falcoeira e Canlebó. Despois haberá verbena co Dúo Aires de Broña.
O venres 22 será o Día na Honra de Santa Rita, e dará comezo coas Pandeireiteiras Falcoeira (dianas e alboradas), e con misas ás 10.00, ás 11.00, ás 12.00 (solemne), ás 19.00, ás 20.00 e ás 21.00 horas. Ao mediodía haberá sesión vermú a cargo de Ana Angueira. A festa do venres 22 de maio culminará cunha gran verbena coa Orquestra New York e para os máis pequenos Planet Discomóbil a mans de Mateo Abelleira.
O sábado 23 de maio celebrarase a cuarta edición da Andaina de Santa Rita, con saída ás 10.00 horas dende Nebra e con inscrición previa. Ás 12.00 horas haberá xogos populares e merenda e logo dará comezo unha sesión vermú a cargo do Trío La Noche, para dar paso a unha degustación de porco e cordeiro ao espeto ou churrasco. Pola tarde, haberá bingo ás 16.00 horas e inchábeis e xogos para a rapazada. A partir das 19.00 horas comezará a verbena con Trío La Noche, que proseguirá máis tarde con Planet Discomóbil e con DJ Jalaiko aos mandos na cabina.
Organizan os veciños da comisión de festas de Santa Rita, en Nebra, coa colaboración do Concello do Porto do Son.
