As Concellerías de Medio Ambiente e Deportes, Xuventude e Ludoteca do Porto do Son organizaron estes días a terceira edición do Concurso dos Maios, unha actividade festiva, creativa e participativa aberta a todos os colexios de Infantil e Primaria do termo municipal.
A actividade incluíu dende este 30 de abril unha exposición aberta na fachada marítima de Porto do Son, que xa se pode visitar na vila, malia o mal tempo destes días.
Amais, contouse cun punto de recollida de maios aberto a toda a veciñanza para seren colocados nas vivendas.
Tras abrirse a inscrición a todas as Escolas Infantís e CEIP do Porto do Son, este ano participan cunhas fermosísimas composicións o CEIP Santa Irene de Porto do Son, o CEIP Portosín, a Escola Infantil Galiña Azul de Porto do Son e a Escola Infantil O Parque de Portosín.
O Concello confirmou que nuns días darase a coñecer a resolución do xurado, ao cal a organización agradeceu “infinitamente” a súa colaboración.
