A Plataforma pola Sanidade Pública do Barbanza levou a cabo esta noite pasada o seu oitavo día de peche no Hospital do Barbanza. Ademais, contabilizaron 818 días desde que solicitaron por primeira vez unha xuntanza co xerente da Área Sanitaria Santiago-Barbanza e o director do Hospital da Barbanza para, segundo sinala a plataforma, “falar das listas de espera reais, ou sexa a espera para consultas de revisión ou probas diagnósticas que se solicitan nas consultas de revisión, e das primeiras ordinarias (non da media de primeiras urxentes, preferentes e ordinarias), así de como abordar a súa diminución”.
Lembran tamén que este xoves 30 de abril, como último xoves do mes, haberá unha nova concentración ás 12 diante do Centro de Saúde de Ribeira.
O colectivo reclama transparencia nas listas de espera e medidas reais para reducir os tempos de atención.
Denuncian “as prolongadas demoras na agarda en atención especializada” e esixen, como dixemos, unha xuntanza co xerente da Área Sanitaria e co director do Hospital do Barbanza.
O peche comezou o pasado martes 21 a xeito de concentración matinal de seis horas e prolongouse logo coas quendas do peche indefinido. Acordouse amplificar as reivindicacións ante “o silencio respecto da petición dunha reunión”. Segundo advertiu a plataforma, o peche “continuará até que se reúnan co xerente da área sanitaria e co director do hospital para falar das listas espera reais e como abordar a súa dimensión”.
