Milleiros de persoas que viven de alugueiro en Galicia contemplan con desespero un ceo que fala nidiamente de retroceso, de volta aos días malos, ás horas perdidas, aos sonos demorados: votos en contra do PP, VOX e Junts, a abstención do PNV e a política na corda frouxa poñen remate ás posibilidades -escasas xa eran- do PSOE de aguantar esta lexislatura na que Sumar tamén vai ao seu cando non ao chou.
O Congreso dos deputados foi o escenario no que, onte pola tarde, o Goberno protagonizaba unha nova derrota parlamentaria: o decreto que prorrogaba a prohibición de suba dos alugueiros impulsado por Sumar, quedou en augas de borralla abrindo fendas ben fondas no bloque de Goberno e afortalando o conformado por PP, VOX e Junts, co PNV xogando ao chou coa a abstención.
Resultado: 177 votos en contra do real decreto,166 a prol e 5 abstencións. Curta vida para unha esperanza: os inquilinos que reclaman a prórroga dos seus contratos de alugueiro quedan ao albur do que os seus caseiros decidan no futuro sempre incerto do seu devir, porque o “traxe” do xastre que deseñara o acordo PSOE-Sumar, rebentou polas costuras.
O ministro de Consumo e Dereitos Sociais, Pablo Bustinduy, deixouno claro: “O que se vota é protexer a tres millóns de persoas ou deixalas á súa sorte”, referíndose á poboación española afectada polo decreto. Este prorrogaba ata dous anos os contratos de alugueiro da vivenda cotiá e limitaba ao 2% a actualización anual da renda en resposta ás consecuencias económicas da guerra de Irán. A derrogación abre agora un escenario de incerteza para os inquilinos que xa tiñan solicitada a prórroga durante o mes que ese decreto estivera vixente. Os tribunais serán os que resolvan,
Será porque os españois teñen que ir primeiro, como preconizan PP, VOX e Junts?. Canto aprenderon estes do “trumpismo”.
