O Goberno local presenta para o seu debate e aprobación no vindeiro pleno da Corporación que se celebrará o 30 de abril o Orzamento Municipal para o ano 2026 que ascende aos 19.136.000 euros. Segundo indicou o Executivo, estas contas seguen a mesma liña que as aprobadas nos últimos anos: “Un presuposto que cubre todas as obrigas municipais, que mellora en servizos e que reduce a débeda”, en palabras do grupo de Goberno.
“Cando entramos no Executivo no ano 2019 a débeda estaba no 42,15%, pechamos o ano 2025 cun 17.90% e imos seguir traballando para que chegue a cero”, recoñece o tenente de alcalde e concelleiro de Facenda, Luís Ruiz.
No relativo ao capitulo dos investimentos, o Orzamento deste 2026 inclúe unha partida para pavimentados e arranxo de vías en varios lugares de todo o termo municipal; investimento na mellora da rede de saneamento e abastecemento municipal; unha partida para o arranxo de centros sociais; investimentos en mellora das infraestruturas deportivas; así como mellora de parques infantís entre outras.
