O Concello de Boiro recibe da Deputación da Coruña unha subvención por importe de 19.195’72 euros para o financiamento do gasto de persoal das oficinas de turismo durante o ano 2026.
No caso de Boiro, a finalidade desta subvención é “aumentar o persoal da oficina de turismo durante o verán co obxectivo de fortalecer e profesionalizar o sector turístico”.
Boiro conta cun inmóbel destas características emprazado no andar baixo da Casa Consistorial: un servizo aberto durante todo o ano e que recibe visitantes de xeito continuado, especialmente durante a época estival. Ademais da información concretar das posibilidades do municipio e a contorna, a Oficina de Turismo de Boiro serve como punto de información do Xeodestino Barbanza Arousa e a provincia da Coruña en xeral.
O persoal do servizo encárgase de desenvolver as actividades que se realizan durante o verán, así como atender as instalacións turísticas e ofrecer información ás persoas visitantes. Ademais, dende a Oficina de Turismo realízase a promoción do Camiño A Orixe a Santiago de Compostela con información e tamén actividades específicas para dalo a coñecer.
Boiro recibe arredor de 3.000 turistas no verán que se benefician dos servizos da Oficina de Turismo, así como arredor dunhas 15.000 persoas que, ao longo do ano, visitan a páxina web municipal de turismo e sérvense dos recursos que se presentan e interésanse polo destino.
