A primeira xornada da regata clasificatoria da clase Clase Optimist estivo marcada por unhas condicións meteorolóxicas pouco habituais na Ría de Muros e Noia, onde a choiva persistente e a escaseza de vento dificultaron o desenvolvemento normal da competición.
Durante gran parte da tarde, a coñecida poalla foi protagonista, impedindo que as probas se disputasen con normalidade. Aínda que o comité logrou dar varias saídas aos dous grupos convocados, as mangas tiveron que ser anuladas ao non poder completarse debido á falta de vento do noroeste.
Tras varios intentos e grazas á persistencia do comité organizador, finalmente atopouse unha zona con vento do nordeste que permitiu validar unha proba para o Grupo Ouro, cuxos regatistas necesitaban sumar resultados ante as últimas prazas en xogo para a selección.
Deste primeira manga saíron os primeiros líderes da competición. En Sub16 masculino situouse á fronte Alejandro Alonso, do Monte Real Club de Iates de Bayona, cun punto. En Sub16 feminino lidera Emma Pérez Roig, do Real Club Náutico da Coruña, con dous puntos.
Na categoría Sub13 feminina, a primeira posición é para Aroa Pérez, do Real Club Náutico de Sanxenxo, con 14 puntos, mentres que en Sub13 masculino encabeza a clasificación Martin Barros, tamén do Monte Real Club de Iates de Bayona, con 17 puntos.
A competición continuará este domingo co sinal de atención prevista para as 11.00 horas. O comité tentará completar ata catro mangas se as condicións meteorolóxicas permiten.
A regata conta co patrocinio de GADIS e a colaboración institucional da Xunta de Galicia, a través da Consellería de Presidencia, Xustiza e Deportes; a Real Federación Galega de Vela; e o Concello de Porto do Son.
