O Concello de Lousame abre o prazo de reserva de praza no Punto de Atención á Infancia, centro para menores de 0 a 3 anos, para o curso 2026-2027. Un prazo que estará aberto até o vindeiro 15 de abril. As persoas interesadas poden dirixirse aos Servizos Sociais municipais, onde se lles facilitará a información e a documentación precisa, ou descargar a solicitude da páxina web municipal.
O Punto de Atención á Infancia é un centro municipal que oferta servizo de gardería para nenos e nenas de 0 a 3 anos, co obxectivo de facilitarlles ás familias de Lousame a conciliación da vida familiar e laboral.
As familias interesadas deberán presentar copias cotexadas do libro de familia e do DNI de ambos proxenitores ou titor/a legal; certificado de convivencia e declaración do Imposto da Renda do último exercicio (ou certificado da Axencia Tributaria no caso de non tela presentado por non estar obrigado).
A maiores, no seu caso poderá presentarse documentación acreditativa das circunstancias familiares: certificados de monoparentalidade, título de familia numerosa, certificado de discapacidade de calquera dos membros da familia, certificado do grao de dependencia, certificado de estar inscrito como demandante de emprego… ou calquera outra circunstancia.
