A Asociación Boirense de Empresas (ABE) renovou o seu convenio de colaboración con Patricia González Romero, avogada especializada en dereito mercantil, reforzando así o seu compromiso de ofrecer aos asociados apoio profesional de calidade.
Grazas a este acordo, os socios da ABE contan con asesoramento en reclamacións de impagos, contratos mercantís e outras cuestións xurídicas que poidan afectar á súa actividade profesional, así como vantaxes exclusivas e descontos nos servizos prestados, aplicables tamén a cuestións de carácter persoal.
A colaboración inclúe tamén a posibilidade de organizar xornadas informativas e outras accións para acercar o asesoramento legal aos membros da Asociación, contribuíndo ao fortalecemento e desenvolvemento das empresas locais.
“Con esta renovación consolidamos o noso compromiso de ofrecer aos asociados servizos profesionais de alto nivel, que lles permitan xestionar con maior seguridade e confianza os aspectos legais da súa actividade”, sinala Daniel García, presidente da ABE.
“Para min é un pracer continuar colaborando coa ABE, poñendo a disposición dos seus socios a miña experiencia en dereito mercantil e reclamación de impagos, e contribuír así á protección e mellora das súas empresas”, engade Patricia González Romero, avogada colaboradora.
Para máis información sobre os servizos e actividades da ABE, pódese consultar a web abe.gal ou os seus perfís nas redes sociais.
