O Concello de Padrón abriu o prazo de inscrición para participar na XLV Carreira Popular de Pascua, que se celebrará o sábado 4 de abril e que volverá converter a vila nun punto de encontro para centos de atletas de todas as idades.
A cita, incluída no calendario oficial da Federación Galega de Atletismo, mantén como escenario de saída e chegada a praza de Macías.
As probas comezarán ás 10.30 horas e prolongaranse ata o peche de meta, previsto para as 13.30 horas.
A inscrición poderá formalizarse ata o mércores 1 de abril ás 23.59 horas a través da web Deporticket.com. Non se admitirán inscricións fóra de prazo.
Categorías e distancias
A carreira está aberta a atletas federados e non federados, cunha única clasificación conxunta agás nas categorías sub 6 e sub 8, que teñen carácter non competitivo.
As distancias oscilarán entre os 80 metros da categoría sub 6 e os 13,3 quilómetros da proba absoluta, que engloba as categorías sub 20, sub 23, sénior e máster.
O programa horario será o seguinte:
10.30 h: Sub 6 (80 m aprox.)
10.40 h: Sub 8 (425 m aprox.)
10.50 h: Sub 10 (625 m aprox.)
11.05 h: Sub 12 (625 m aprox.)
11.15 h: Sub 14 (2 km aprox.)
11.30 h: Sub 16 e Sub 18 (3,5 km aprox.)
12.00 h: Sub 20, Sub 23, Sénior e Máster (13,3 km aprox.)
A participación será gratuíta para todas as categorías escolares ata sub 18. Na proba absoluta, o custo da inscrición é de 7 euros.
Todos os escolares recibirán unha medalla ao cruzar a liña de meta, mentres que haberá trofeos para os tres primeiros clasificados de cada categoría competitiva. A proba absoluta contará ademais cun Trofeo Especial de Pascua para os tres primeiros clasificados.
Tamén se entregarán premios aos tres primeiros equipos clasificados, ao primeiro corredor e corredora local da proba absoluta, ao club con maior número de atletas que finalicen a carreira (Trofeo Participación) e ao participante de maior idade que complete o percorrido (Trofeo Supermáster). Todos os inscritos recibirán un agasallo conmemorativo.
Servizos para os participantes
A organización habilitará recollida de dorsais no Paseo do Espolón a partir das 9.30 horas o mesmo día da carreira. Ademais haberá servizo de gardarroupa, cronometraxe por chip, sinalización quilométrica, avituallamento intermedio e en meta, duchas nos pavillóns municipais do Grupo Escolar e do Souto, servizo médico e ambulancia, así como seguro de accidentes e responsabilidade civil.
