Aproveitando o pequeno respiro do clima e das chuvias desta semana, o Concello de Rianxo comezou coas obras para a renovación completa do firme da vía de acceso ao Montiño dende a DP-7203 (Taragoña).
O proxecto inclúe a limpeza previa de toda a superficie afectada, o rebaixe do pavimento actual diante da vivendas onde a pista queda á mesma cota que a parcela, arranxo previo de fochancas nos puntos máis deteriorados na actualidade, instalación de novos imbornais e sumidoiros que evacúen a auga a través da rede existente, así como a aplicación, ao remate de todo o anterior, dunha mestura de aglomerado asfáltico aplicado en quente cunha media de 6 centímetros de espesura.
O alcalde Julián Bustelo informou que “xa a finais do 2023 executamos unha obra para mellorar o treito de vía que une o Montiño con Te”. Entre as dúas actuacións, o investimento total case chega aos 150.000 euros, engadiu.
