O PSdeG-PSOE de Rianxo emitiu un comunicado no que manifesta a súa “preocupación” ante a situación económica do concello, que, segundo din, “afronta un segundo ano consecutivo con orzamentos prorrogados sen que exista, a día de hoxe, unha proposta formal de contas para 2026 nin comunicación cos grupos da oposición ao respecto”. Ante esta situación (sosteñen que o Concello “continúa sen planificación económica definida para o exercicio actual”, malia ser a folla de ruta orzamentaria “fundamental para garantir servizos e investimentos”), o grupo manifesta a súa “total disposición ao diálogo e á colaboración co Goberno municipal, coa intención de contribuír á elaboración dun orzamento equilibrado e con prioridades claras para 2026”.
Seguindo o dito fío propoñen unha serie de liñas prioritarias a incorporar nos orzamentos de 2026:
-Organización e planificación municipal, garantindo unha aplicación responsábel e progresiva da RPT.
-Mellora de infraestruturas e espazos municipais, especialmente nas instalacións deportivas e accesos escolares.
-Apoio ao deporte local, incrementando as axudas aos clubs e establecendo bolsas para deportistas individuais.
-Apoio á comunidade educativa, en especial mediante axudas directas ás ANPAS.
-Impulso ao tecido económico local, reforzando o apoio á ARE e promovendo medidas de dinamización comercial.
-Planificación de solo industrial, abrindo o debate sobre a procura dunha localización para un novo polígono industrial que permita garantir o desenvolvemento económico futuro do municipio, valorando tamén as posibilidades de ampliación ou aproveitamento do actual Polígono de Té como opción máis inmediata.
-Mantemento ordinario dos espazos públicos, incorporando partidas específicas para limpeza, mobiliario urbano, iluminación, xardinería e rozas, garantindo así a conservación axeitada das infraestruturas e unha mellor calidade de vida para a veciñanza.
-Avance na licitación dos servizos municipais que continúan en situación de precariedade administrativa, garantindo a súa regularización mediante contratos estábeis, transparentes e con planificación a medio prazo, que melloren a calidade do servizo, aporten seguridade xurídica ao Concello e dignifiquen as condicións laborais das persoas traballadoras vinculadas a estes servizos.
O PSdeG-PSOE de Rianxo reitera a súa disposición ao diálogo e á negociación co Goberno municipal pero advirten: “Para negociar ten que existir un documento enriba da mesa e un calendario claro. Rianxo merece responsabilidade, seriedade e unha folla de ruta definida para o seu futuro”.
