O Concello de Boiro vén de facer balance das súas máis recentes actuacións en materia de acondicionamento e posta en valor dos centros municipais, unhas tarefas que puxeron o foco estes días nos centros educativos. Esta semana comezaron as tarefas de substitución de parte das xanelas do CEIP Santa María do Castro, unha obra que segundo o Goberno local viña sendo “moi demandada” pola comunidade educativa e “que hai 10 anos que comezou a executarse”. A finalidade destas tarefas é asegurar que cando regrese a normalidade docente se faga nas mellores condicións posíbeis.
Respecto das obras que se realizan no edificio de Valiño, o Concello lembra que comezaron en 2010 pero que non puideran ser rematadas no que se refire ás xanelas, cuxa substitución estaba aínda pendente. Neste punto, co fin de darlle remate, o Goberno local chegou a un acordo coa Xefatura Territorial para que recaia nesta entidade o material e no Concello de Boiro a man de obra. Nesta primeira fase estanse a substituír unhas 30 ventás, “pero para finalizar por completo a obra faltan por chegar outras 60”, sinalou o Executivo local, engadindo que está pendente o envío das xanelas restantes desde Xefatura Territorial.
Por outra banda, co fin de seguir aproveitando esta paréntese da desescalada para seguir avanzando en melloras, o Concello solicitou a todos os centros de ensino do termo municipal que acheguen unha relación das necesidades para poder executalas durante estes meses. O obxectivo do Goberno local é que todos os centros estean listos para cando se retomen as clases do vindeiro curso escolar.
