A Confraría de Noia acordou “por maioría” non renovar a actividade marisqueira correspondente á campaña 2025/2026 ante a elevada mortaldade detectada nos bancos da ría.
Segundo informou a entidade, as mostraxes realizadas este xoves en distintas zonas constataron perdas moi significativas nas principais especies de explotación. No caso da ameixa babosa, a mortaldade acada o 90 %, mentres que no berberecho —principal recurso comercial da ría de Muros e Noia— sitúase arredor do 80 %. Pola súa banda, a ameixa xapónica rexistra unha mortaldade do 40 %.
Os datos afectan tanto aos bancos marisqueiros explotados a pé como aos de embarcación, o que agrava a situación do sector na zona.
Ante este escenario, a confraría solicitará á Consellería do Mar o “peche por causa de forza maior”, co obxectivo de poder acceder ás prestacións ou axudas correspondentes para paliar o impacto económico entre os profesionais do mar.
