A Comisión pola Recuperación da Memoria Histórica do Barbanza organiza esta fin de semana unhas xornadas de homenaxe aos veciños de Boiro fusilados en febreiro de 1937 e soterrados no cemiterio de Boisaca.
A primeira xornada terá lugar o sábado 21 no Pazo de Goiáns, onde a partir das 11.00 horas se celebrarán distintas conferencias centradas na memoria histórica e na recuperación da dignidade das vítimas do franquismo. A programación continuará cun rueiro da memoria polas rúas de Boiro, co obxectivo de lembrar os feitos e ás persoas represaliadas.
A segunda xornada desenvolverase o domingo 22 de febreiro cunha homenaxe solemne no Cemiterio de Boisaca, lugar onde foron enterrados os boirenses fusilados.
Para facilitar a asistencia, a Comisión disporá dun autobús con saída desde Ribeira e paradas en Palmeira, Escarabote, A Pobra, Boiro e Rianxo. Co fin de organizar a viaxe, a entidade solicita ás persoas interesadas que comuniquen previamente a súa intención de participar, indicando tamén a parada na que desexan ser recollidas. Desde a organización animan á veciñanza da comarca a sumarse a estes actos de memoria, lembranza e xustiza histórica.
