O Centro Social de Boiro acollerá este xoves 19 de febreiro a presentación do Caderno Cultural centrado nos entroidos tradicionais do concello. A cita será ás 21.00 horas no Centro Social. Trátase dunha nova edición dos Cadernos Culturais, achegados polo Concello (coa colaboración da veciñanza e dos seus testemuños directos) baixo o epígrafe Memoria do pobo.
Como de costume, a publicación poderá conseguirse de xeito gratuíto nos Centros Sociais municipais.
Este número constitúe unha nova etapa dos Cadernos Culturais, editados polo Concello de Boiro dende 1991. Baixo o epígrafe Memoria do pobo, céntranse en recoller e catalogar fitos sociais da veciñanza, das persoas do cotiá, entendendo que a memoria como a cultura, tamén é cousa da cidadanía.
O novo volume é un percorrido polos Entroidos das parroquias, poñendo o foco (en parte) nas tradicionais cerimonias de queima/enterro de personaxes (O Farruco, A Cunca, O Óso, O Felipiño).
