Unha cámara de seguridade do Forno de Lúa, en Ribeira, rexistrou a última incursión dun dos delincuentes habituais que operan pola cidade. O ladrón aproveitou un breve momento de descoido da empregada —que estaba no cuarto traseiro preparando pastelería— para entrar e saír en apenas sete segundos co botín.
“A moza estaba limpando as mans cando o viu marchar. Pensou que non levaba nada, só uns chupas tirados no chan. Pero despois, ao ir meter os billetes, decatámonos de que faltaban o táper e o estoxo. Entón dixo: tamén levou o estoxo”, explica Mónica Luna, dona do establecemento.
A propietaria calcula que o ladrón se fixo con uns 600 euros entre o diñeiro gardado nos dous recipientes. As imaxes amosan que o home levaba tempo vixiando dende fóra do local ata dar co momento axeitado para actuar.
“Fun poñer a denuncia e dixéronme que non había moito que facer. É continuo, non é que rouben 600 euros e xa está. É continuo: tira dos bolsos, fai dano á xente maior… Mesmo o fixo cunha muller embarazada. Non lle podes facer nada, ríse na túa cara”, lamenta Luna.
O roubo inscríbese nunha serie de incidentes recentes na zona: noutra panadaría tentaron acceder sen éxito, estragando a porta; no chiringuito da praia de Coroso lograron levar bebidas tras romper un cristal; e tamén houbo outro asalto nun salón de peiteado, onde romperon unha ventá para entrar.
