O Casino de Noia acolleu esta semana a presentación Campionato Xunta de Galicia de Ergómetro, que se celebrará este domingo no Pavillón Municipal Agustín Mourís e que contará cunha participación histórica que supera os 1.100 deportistas inscritos.
No acto estiveron presentes a concelleira de Deportes do Concello de Noia, Sandra González, e Chus Blanco, representante da organización, quen destacaron a relevancia desta cita deportiva tanto polo seu nivel competitivo como polo seu carácter accesible e inclusivo.
A concelleira de Deportes salientou o importante crecemento do evento, sinalando que “o número de participantes supón un récord histórico, duplicando as cifras de anteriores convocatorias e consolidando a Noia como unha referencia dentro do calendario deportivo galego”.
Así mesmo, a edil destacou o valor social do ergómetro como “un deporte accesíbel e integrador, capaz de reunir persoas de condicións moi diversas e promover a participación a través do deporte”.
Desde o Concello de Noia convidouse á veciñanza a asistir e desfrutar da xornada, reafirmando ademais o apoio institucional ao Club de Remo Noia polo seu traballo na promoción do deporte e na organización de eventos de relevancia autonómica.
Pola súa banda, Chus Blanco destacou o alto nivel deportivo da competición, indicando que “o campionato contará coa participación de deportistas olímpicos, tanto en activo como históricos, así como coa presenza da práctica totalidade dos clubs de remo de Galicia, convertendo esta cita nun referente dentro do calendario autonómico”.
O Campionato Xunta de Galicia de Ergómetro reunirá este domingo 15 de febreiro a centos de deportistas e afeccionados nunha xornada que combinará competición, convivencia e promoción de valores como o esforzo, a inclusión e o traballo en equipo.
