Coa chegada do mes de febreiro vai collendo corpo o Entroido de Rianxo, que terá un dos seus momentos álxidos o domingo 15 de febreiro co Certame de Carrozas e Disfraces en Grupo, en palabras do Concello “unha cita chea de cor, imaxinación e bo humor”, á que está convidada toda a poboación rianxeira. Trátase, segundo informou o Goberno local, “dun evento de carácter popular e participativo” onde “a tradición choqueira, a crítica satírica e a exaltación da festa tradicional serán os elementos clave”.
Serán mobilizados e repartidos máis de 4.000 euros en premios para os mellores disfraces grupais e carrozas. As inscricións xa están abertas.
As persoas interesadas en participar poden consultar as bases no Taboleiro de Anuncios da Sede Electrónica do Concello de Rianxo e máis na web municipal.
Na modalidade de carrozas, haberá un 1º premio de 900 euros, un 2º de 700 e un 3º de 500. Achegarase unha gratificación por participar de 150 euros.
En disfraces de grupo, os premios serán de 400, 300 e 200 euros, a gratificación de 50.
Para máis información, pódese contactar co Auditorio de Rianxo (luns a venres, de 09:00 a 14:00 h), no teléfono 981 100 688 ou no correo cultura@concelloderianxo.gal.
