O Concello de Rianxo informou da saída a licitación da obra destinada á ampliación da rede municipal de abastecemento de auga entre Corques e Outeiro, na parroquia de Taragoña.
A actuación, que conta con orzamento 90.713,70€, permitirá darlles servizo ás vivendas existentes na zona norte da AC-305 ao seu paso por Outeiro. Ademais, renovarase completamente o firme da estrada que comunica Outeiro con Corques.
Informar tamén de que o Concello rematou 2025 coa adxudicación de tres importantes obras que se executarán en datas vindeiras: a segunda fase do proxecto para a dotación de redes de abastecemento e saneamento en Vilas (Asados), por un importe de 194.386,50 euros; a ampliación das redes de abastecemento e saneamento en Meiquiz e Or (Leiro) cun investimento de 208.785,50€; e máis a renovación completa do firme da vía de acceso ao Montiño dende a DP-7203 (Taragoña), por un importe de 102.952,85€.
Ao devandito súmase a ampliación das redes de abastecemento e saneamento en Villanustre (Asados) – 194.386,50€.
