A asociación agroecolóxica da nosa comarca Sachos á Rúa convida a toda a cidadanía de Ribeira, e moi en particular ao alumnado e profesorado dos colexios cos que levamos tempo colaborando, á primeira fase de plantación do Proxecto Comunitario de Bosque Comestible do Parque Periurbano de San Roque.
Esta primeira fase de plantación desenvolverase na primeira semana de febreiro: o martes, día 3, de 10:00 a 13:00; e o sábado día 7 de 10:00 a 14:00.
Os bosques comestíbeis son unha alternativa ambiental que imita a estrutura funcional dun bosque natural e permite cultivar alimentos aproveitando o espazo e recuperando solos degradados, constituíndose ademais como unha protección natural contra os incendios forestais do verán.
Os bosques comestíbeis achegan os seguintes beneficios:
-Conservación da biodiversidade.
-Autorregulación.
-Beneficios para a aterra: melloran a súa estrutura e fertilidade.
-Impulsan a absorción de CO2.
-Achegan alimentos e recursos naturais.
-Contribúen a evitar a propagación de lumes grazas á humidificación do terreo e a baixada de temperatura que proporcionan.
