Este pasado sábado pola 20 de decembro tivo lugar no Casino de Noia a presentación da exposición Trazos de Paixón, que reúne obra de Alfonso Costa, Isabel Pintado e Soledad Penalta, tres artistas cunha longa traxectoria que levaban tempo sen expoñer vila noiesa.
O acto contou cunha ampla asistencia de achegados, veciños e veciñas, así como coa presenza da concelleira de Cultura, Chelo Martínez, que abriu a presentación.
A continuación, Pilar Sampedro realizou unha introdución á obra dos tres artistas, dando paso ás intervencións de Alfonso Costa, Isabel Pintado e Soledad Penalta, quen agradeceron a presenza do público e destacaron que Noia segue a ser para eles un lugar fundamental, cun oco especial no seu corazón.
A presentación estivo acompañada dun prólogo poético e musical a cargo da voz da noiesa Esperanza Mara, quen tamén ofreceu varias interpretacións para pechar o acto.
A exposición poderá visitarse de luns a sábado, en horario de 11:00 a 14:00 h, no Edificio Casino de Noia.
Permanecerá pechada os días 25 e 31 de decembro, así como o 1 e o 6 de xaneiro.
Como dixemos, a mostra pon en valor o traballo de tres artistas cunha fonda ligazón coa creación contemporánea galega. A proposta reúne a obra de Alfonso Costa, pintor noiés, Soledad Penalta, escultora noiesa, e Isabel Pintado, pintora e galega de acollida, cuxa traxectoria artística enriquece o diálogo cultural do país.
A mostra estrutúrase en catro espazos diferenciados no primeiro andar do edificio:
Un espazo dedicado á escultura de Soledad Penalta.
Un espazo de pintura de Alfonso Costa.
Un espazo de pintura de Isabel Pintado.
Un espazo común, no que dialogan as obras dos dous pintores nunha homenaxe a María Casares, figura esencial da cultura galega.
