A conselleira de Política Social e Igualdade, Fabiola García, e o alcalde de Outes, Francisco Calo, visitaron a parcela proposta polo Concello para a creación dun centro residencial para persoas con discapacidade, un proxecto que contempla a reutilización dun inmoble que anteriormente funcionou como colexio.
Desde o Concello de Outes sinalan que este edificio, de tres alturas, reúne as condicións axeitadas para albergar o futuro centro residencial, xa que se atopa nunha zona ben comunicada co resto do municipio e coa contorna. O alcalde trasladoulle á conselleira, nunha xuntanza celebrada hai unhas semanas en San Caetano, a necesidade de poñer en marcha un servizo deste tipo co obxectivo de dar resposta ás demandas das familias de persoas con discapacidade da zona.
Durante a visita, Fabiola García reiterou o compromiso da Xunta de Galicia co impulso das políticas sociais en todos os concellos galegos, facendo especial fincapé nos municipios do ámbito rural. Neste sentido, destacou que recentemente o Goberno galego ampliou a escola infantil situada no mesmo complexo ata acadar as 41 prazas de educación de 0 a 3 anos, así como a posta en marcha e mantemento doutros recursos sociais, como o centro de día para persoas maiores.
A conselleira subliñou tamén o apoio continuado da Xunta ás entidades sociais do sector da discapacidade e lembrou que o Executivo autonómico asumiu en solitario, sen achega do Goberno central, o incremento dos custos derivados da suba dos convenios colectivos estatais que afectan ao persoal deste ámbito, co fin de garantir a calidade dos servizos e a estabilidade laboral.
Este proxecto de centro residencial para persoas con discapacidade suporía un novo avance na rede de recursos sociais da comarca, reforzando a atención ás persoas máis vulnerables e contribuíndo a fixar poboación no territorio.
