O Concello de Muros levou a cabo no ano 2025 unha serie de actividades coas que se pretendeu dar a coñecer a problemática das especies exóticas invasoras entre a veciñanza e sectores concretos da poboación, así como realizar un mapeo das especies invasoras coa finalidade de promover accións encamiñadas ao control e eliminación das mesmas.
Así o explicou María Lago, alcaldesa e responsábel da área de medio ambiente, concretando que este programa incluíu visitas de recoñecemento, exposicións e charlas en centros educativos, inventario de especies invasoras, eliminación de especies invasoras a través de voluntariado ambiental e, por último, un curso de formación teórico-práctico para o persoal do concello que ten relación ou competencia coa xestión das especies invasoras.
Este curso de formación teórico-práctico para o persoal da brigada de medio ambiente tivo lugar o 26 de novembro. Consistiu nunha pequena exposición teórica sobre as especies exóticas invasoras: como se introduciron, problemas que causan, formas de eliminación, lexislación…
Posteriormente, realizouse a parte práctica, que tivo lugar na zona do Ancoradoiro, onde as persoas participantes levaron a cabo a eliminación da especie Carpobrotus edulis, coñecida como unlla de gato, unha especie invasora que ameaza gravemente os nosos ecosistemas costeiros. Nesta xornada eliminaron 35 sacos cuns 600 quilogramos de Carpobrotus.
