O Auditorio do Centro Cultural e Xuvenil de Muros continúa coa súa programación de cine de inverno cunha fin de semana que combina thriller español de alta calidade e aventura familiar para todos os públicos.
As películas Golpes, de Rafael Cobos, e Super Charlie, adaptación da coñecida serie infantil de Camilla Läckberg, serán as protagonistas dos días 12, 13 e 14 de decembro.
Golpes, un thriller sobre memoria e lazos familiares
Protagonizada por Luis Tosar e Jesús Carroza, Golpes supón o debut na dirección de Rafael Cobos, guionista multipremiado (La isla mínima, El hombre de las mil caras). Ambientada na Sevilla dos anos 80, a película segue a dous irmáns situados en lados opostos da lei que deben enfrontarse ao pasado familiar e ás feridas que a sociedade trata de esquecer.
Trátase dun thriller intenso, frenético e emocional, convertido nun dos filmes españois máis esperados do ano.
– Venres, 12 de decembro ás 20:30 h
– Sábado, 13 de decembro ás 20:30 h
– Domingo, 14 de decembro ás 19:00 h
Super Charlie, humor, maxia e irmáns que salvan o mundo
Pensada para público infantil e familiar, Super Charlie conta a historia de Wille, un neno que sempre soñou con ser súper heroe, ata descubrir que o seu irmán bebé ten auténticos superpoderes. Cando un vilán ameaza a cidade, ambos deberán aprender a colaborar nunha aventura chea de humor, acción e mensaxes positivas.
– Sábado, 13 de decembro ás 17:00 h
– Domingo, 14 de decembro ás 17:00 h
Entradas dispoñíbeis nas oficinas do Centro e Cultural e Xuvenil de Muros e na billeteira electrónica.
A concelleira de Cultura, Caridad González, destacou que “seguimos apostando por unha programación variada e de calidade, con propostas que permiten ao público gozar do mellor cinema actual sen saír de Muros”. Engadiu tamén que “é importante ofrecer alternativas para todos os públicos, desde o cine máis autoral ata películas familiares que unen xeracións”.
