O Polígono da Tomada (A Pobra do Caramiñal) acollerá este xoves 4 de decembro, en horario de 09.30 a 15.00 horas, a unidade móbil da Axencia de Doazón de Órganos e Sangue (ADOS), que se situará enfronte ás instalacións de Protección Civil.
Co obxectivo de incentivar o altruísta xesto da doazón, a compañía galega de distribución alimentaria Vegalsa-Eroski sorteará unha cesta con produtos do Nadal entre todas as persoas que se acheguen a doar sangue durante a xornada.
“A iniciativa enmárcase nas accións de dinamización que desde a xunta directiva da Entidade Urbanística de Conservación do Polígono Industrial da Tomada impulsamos co propósito de converter o espazo nunha contorna atractiva e aberta a todo tipo de actividades, incluídas aquelas de carácter social e benéfico”, resaltou a presidenta do organismo, Isabel Cañas, directora de Relacións Externas de CONGALSA, empresa con sede na Tomada.
Neste sentido, “a colaboración con Vegalsa-Eroski reforza esta liña de traballo, favorecendo a implicación do tecido empresarial en iniciativas de interese colectivo”, engadiu Cañas, sinalando que esta participación reforza ademais os lazos entre a empresa de distribución alimentaria, o polígono e ADOS, consolidando unha relación de colaboración positiva.
Dinámica do sorteo
Durante toda a xornada, as persoas que acudan a doar sangue poderán cubrir os seus datos nos cupóns habilitados para o efecto e depositalos nunha urna situada na unidade móbil.
Ás 15.00 horas, unha vez finalizado o horario de doazón, procederase a extraer un cupón gañador, cuxo titular poderá recoller a cesta con produtos típicos do Nadal durante a tarde de mañá no Eroski Center da Pobra do Caramiñal.
A Entidade de Conservación do Polígono da Tomada anima á cidadanía e ás empresas da zona para participar nesta acción solidaria, lembrando que cada doazón conta e pode contribuír a salvar vidas.
