A Comisión pola Recuperación da Memoria Histórica (CRMH) do Barbanza e Nova Escola Galega fixeron entrega dos premios do I Certame de Memoria Histórica do Barbanza. O acto tivo lugar no IES Félix Muriel de Rianxo, onde se deron a coñecer os proxectos galardoados desta primeira edición.
Os traballos premiados foron A cara dunha xeración: unha recompilación da vida de Joaquín Soliño Barbeito e a súa familia, realizado por Lucía Varela, Nicanor Lago, Sara Lago e Sara González, alumnas do IES Pedro Floriani de Redondela; e O patrimonio de Sabugueira, elaborado polo CEIP Plurilingüe Mestre Rodríguez Xixirei de Santiago de Compostela. Durante a cerimonia, as autoras presentaron os seus proxectos ante o público, exercendo como representantes do centro compostelán Alba Recarey e Sara Carou.
O historiador José Antonio Pérez Fernández participou no acto cun discurso centrado na importancia da memoria democrática e do estudo da historia no ámbito educativo. A xornada estivo conducida por Mariló Candedo, presidenta de Nova Escola Galega, mentres que a entrega dos galardóns correu a cargo de Carlos Cimadevila Álvarez, presidente da CRMH do Barbanza, e do artista e membro da Comisión Che Tembra.
Tamén asistiu a concelleira de Patrimonio Histórico e Memoria de Rianxo, Olalla Figueira Castaño, quen participou na entrega dos premios e felicitou as participantes polo seu labor investigativo.
O evento contou cun acompañamento musical a cargo do saxofonista Bernal Muíños, que puxo o toque final á celebración desta primeira edición dun certame que busca impulsar o estudo, a reflexión e o compromiso coa memoria histórica entre a mocidade galega.
