O domingo 30, San Andrés. en Galicia, a situación meteorolóxica será de transición, con altas e baixas presións afectando á comunidade e unha circulación do norte. Este escenario provocará a formación de néboas nas comarcas do interior, especialmente nas primeiras horas do día, e ceos parcialmente nubrados, alternando entre claros e nubes.
En canto á precipitación, agárdanse chuvascos illados e ocasionais que afectarán principalmente á metade norte da comunidade, e que irán remitindo co paso do día. Pola súa parte, nas Rías Baixas, os ceos estarán máis despexados, permitindo que a zona goce de mellores condicións meteorolóxicas.
En relación ás temperaturas, experimentarán un lixeiro a moderado descenso, especialmente nas mínimas, que será máis notorio nas zonas do interior.( mínimas de 4 e máximas de 14 graos).
Respecto ao vento, soprarán do norte con intensidade frouxa en xeral, agás no litoral, onde se agardan ventos moderados.
En resumo, o día será de transición, con tempo variable, chuvascos localizados e temperaturas algo máis frías, especialmente pola mañá.
O noso mar: Vento do nordés á mañá, do norte á tarde e do sur á noite, forza 3 a 4 á mañá e á tarde e 1 a 3 á noite. Marusía á mañá e á tarde e mar ovellado á noite. Visibilidade boa. Mar de fondo do noroeste, con ondas de 2 a 3 metros á mañá, 1.5 a 2.5 metros á tarde e 1 a 2 metros á noite.
