O Concello de Boiro abre o vindeiro luns día 1 de decembro o prazo de inscrición no Campamento de Nadal 2025 que se vai desenvolver entre o 22 de decembro de 2025 e o 7 de xaneiro de 2026. As prazas son limitadas e as inscricións para participar deben formalizarse antes do 11 de decembro.
Este servizo está dirixido a nenos e nenas de entre 3 e 12 anos escolarizados, co obxectivo de facilitar ás familias un recurso de conciliación con horarios flexíbeis axustado ás súas necesidades e ofrecer unha alternativa lúdica, formativa e integradora de ocio e tempo libre.
O Concello explicou que o desenvolvemento das actividades a realizar “está baseado en técnicas de intervención participativas e activas, fomentando a creatividade e os valores de respecto e solidariedade con enfoques non sexistas”.
O campamento desenvolverase entre o 22 de decembro e o 7 de xaneiro, agás sábados, domingos e festivos, en horario de 8.00/10.00 a 14.00 horas, xa que se flexibiliza a hora de entrada para facilitar a conciliación. O custo do campamento é de 70 euros en horario de 8.00 a 14.00 horas e de 50 euros para o horario de 10.00 a14.00 horas, habendo descontos para segundos irmáns e tamén nos casos de exclusión social.
O número de prazas está limitado a 50 e os criterios de selección serán segundo orde de entrada, estar empadroado no concello de Boiro e a ocupación laboral dos proxenitores ou titores legais. O prazo de inscrición estará aberto do 1 ao 11 de decembro e deberá facerse mediante o Rexistro Xeral ou sede electrónica do Concello de Boiro. Unha vez publicada a listaxe provisional de admitidos e pasado o prazo de reclamacións, os participantes deberán aboar a taxa correspondente para formalizar a matrícula.
As bases de participación e toda a documentación da inscrición está a disposición das persoas interesadas na web municipal.
