Unidades da Policía Nacional de Vilagarcía de Arousa, Santiago e dos Grupos de Resposta Especial para o Crime Organizado (GRECO) teñen en marcha este mércores un operativo contra o narcotráfico en diversos puntos da comarca do Salnés, no que se empregaron mesmo escavadoras para realizar algúns rexistros.
Segundo informou o subdelegado do Goberno en Pontevedra, Abel Losada, a operación arrincou primeira hora da mañá e, ata o momento, efectuáronse tres rexistros en tres propiedades distintas, que se saldaron con varios detidos.
O dispositivo, que se desenvolve principalmente nos concellos de Vilanova de Arousa e Ribadumia, permanece baixo segredo de sumario. Segundo fontes consultadas por Europa Press, entre os arrestados figuran dous homes vinculados familiarmente, un deles con antecedentes por tráfico de heroína.
Losada explicou que esta actuación é a continuidade doutra operación antidroga realizada hai unhas semanas noutra comarca galega, dentro da estratexia de presión policial constante contra as redes criminais.
O subdelegado quixo trasladar o seu recoñecemento aos equipos despregados no operativo, destacando “a profesionalidade, exhaustividade e compromiso” da Policía Nacional na loita contra o narcotráfico. “A sociedade pode estar segura de que, nesta batalla difícil e permanente, contamos cos mellores profesionais”, afirmou.
