Os feitos xulgados ocorreron o 9 de xaneiro de 2022. O acusado e a vítima discutiron nun bar de Boiro e o culpable saíu e envioulle unha mensaxe ao irmán do afectado advertíndolle que ía matalo.
A Audiencia Provincial, sección sexta de Santiago, impuxo unha pena de dous anos de prisión —cunha suspensión de tres anos— ao home acusado de tentar matar outro en Boiro o 9 de xaneiro de 2022, tras alcanzarse un acordo de conformidade entre as partes que rebaixou de forma notable a solicitude inicial da Fiscalía.
Os feitos tiveron lugar nun bar da localidade, onde acusado e vítima iniciaron unha discusión. Tras saír do establecemento, o agresor enviou unha mensaxe ao irmán do afectado advertindo de que “ía matalo”. Pouco despois, ambos volveron coincidir no exterior e produciríase unha nova disputa.
Segundo o relato xudicial, o acusado colleu unha arma de aire comprimido modificada para disparar perdigóns e efectuou dous tiros contra a vítima, impactando nunha das pernas. As lesións foron de tal gravidade que o afectado permaneceu ingresado 30 días e tivo que someterse a seis intervencións cirúrxicas.
A Fiscalía cualificara inicialmente os feitos como un delito de homicidio en grao de tentativa e pedía oito anos de prisión, ademais dunha orde de afastamento de 50 metros durante dez anos e unha indemnización de 25.000 euros.
Co acordo alcanzado, explicado polo avogado da defensa, Diego Reboredo, a pena queda reducida a dous anos de prisión e a indemnización elévase ata os 35.000 euros. O tribunal acordou suspender a pena de cárcere durante un prazo de tres anos, sempre que o condenado non cometa outro delito, cumpra a orde de afastamento e complete o pagamento da indemnización —da que xa abonou 20.000 euros—.
Sobre a rebaixa da condena aplicáronse as atenuantes de confesión, reparación do dano e actuación baixo os efectos das drogas.
O acusado deberá ademais respectar unha orde de afastamento de 100 metros da vítima e ten prohibido comunicarse con ela durante os próximos sete anos.
