A Consellería do Mar decidiu atrasar un mes, ata o 1 de xaneiro, o inicio da campaña de extracción de mexilla. A resolución foi adoptada tras a reunión da Comisión do Mexillón celebrada este martes en Santiago de Compostela, tendo en conta criterios técnicos e científicos e logo de escoitar a opinión do propio sector.
Durante o encontro, o director do Centro de Investigacións Mariñas (CIMA), Carlos Gabín, presentou os resultados do proxecto Apromex, que detectan unha menor dispoñibilidade de recurso e un tamaño insuficiente da mexilla para iniciar a campaña con garantías. Estes datos foron tamén asumidos polos representantes do sector, que apoiaron a medida.
A conselleira do Mar, Marta Villaverde, subliñou que a decisión “sae do consenso entre a Administración, os científicos e o sector e vela pola sustentabilidade dun recurso tan importante para Galicia”. O obxectivo, remarcou, é asegurar que o sector miticultor dispoña da cantidade necesaria de mexilla para desenvolver unha campaña adecuada.
Ademais, na reunión analizouse a situación do episodio actual de biotoxinas, co propósito de establecer medidas de xestión que permitan manter a actividade nas zonas afectadas ata a súa reapertura.
O sector do mexillón galego, considerado estratéxico, está integrado por preto de 3.600 bateas distribuídas ao longo da costa. Villaverde destacou que este encontro exemplifica o modelo de cogobernanza que rexe a xestión pesqueira en Galicia e que, dixo, resulta fundamental para reforzar o liderado da comunidade nesta actividade.
