O Concello de Boiro vén de dar por finalizadas as obras para a mellora dos accesos e servizos á praia de Mañóns, unha actuación que se levou a cabo mediante o financiamento da Deputación da Coruña a través do Plan de Obras e Servizos (POS+) por un importe de 67.387 euros.
O Concello explicou que con estas actuacións que veñen de finalizar mellorouse o firme da vía de acceso para crear un percorrido seguro á zona da praia, “dotándoa de novos espazos de estacionamentos e sendeiros para peóns”. Ademais levouse a cabo a canalización de augas pluviais eliminando a canle transversal (tajea) que, segundo informou o Goberno local, xeraba problemas de seguridade viaria.
Executouse a renovación de 180 metros de vía cun ancho de 8 metros, deixando a cada marxe beiras de 5 metros cun acabado de area cemento para facilitar o acceso de peóns á praia. Para o pavimento empregouse mestura bituminosa en quente de 5 cm de espesor con regos de adherencia entre capas. Rematouse a actuación co pintado das marcas viarias e sinalización.
