Cada día espertamos con máis asasinatos de mulleres inocentes, como consecuencia da violencia machista ou de xénero, que pon en evidencia que as medidas adoptadas non son suficientes. Todos podemos facer moito máis para erradicar a “violencia machista”. Tamén é necesaria unha maior valentía política e menos demagoxia por parte dalgunhas formacións políticas negacionistas, con implicación de todos os organismos e entidades públicas: municipios, deputacións provinciais, gobernos autonómicos, gobernos estatais así como desde a propia Unión Europea.
Por desgraza demasiadas nais aplauden e amparan as actitudes “machistas” dos seus propios fillos e renegan do “feminismo” a pesar de que este o único que busca é a igualdade real entre os homes e as mulleres. Certas nais, actualmente, seguen soportando situacións de violencia machista poñendo por diante e como desculpa o “benestar” dos seus fillos. Moito mozas continúan vendo como algo “normal” que, o seu noivo ou parella as insulte ou as controle nas súas relacións sociais, ou que simplemente lles revisen o móbil ou o contido das súas redes sociais.
Na nosa sociedade é algo habitual que se deixe ver as mulleres maltratadas, no canto de como vítimas que é o que son, como as propias “responsables” por non denunciar aos seus verdugos. Tampouco nos podemos esquecer de que a violencia contra as mulleres afecta tamén os fillos, que viven e padecen ese auténtico inferno.
