Este venres 21 de novembro presentouse en Rianxo, nun Auditorio Municipal ateigado de asistentes, o médico e ex alcalde de Teo e Santiago, Martiño Noriega, presentou o seu libro Os médicos tamén enferman, unha reflexión que fala da sanidade actual, mais tamén da saúde da nosa sociedade e que, segundo salientou o propio Noriega, reivindica a importancia dos coidados e de pecharmos fileiras arredor da “tribo” para encarar o mañá.
Contouse coa presenza do autor e máis de José Ramón Alonso Fernández (avogado e ex-secretario da Administración local), Henrique Alvarellos (editor) e Julián Bustelo (alcalde de Rianxo).
Doce anos despois de exercer como alcalde, primeiro no Concello de Teo, e despois en Santiago de Compostela, Martiño Noriega regresou á súa profesión, a Medicina. Os médicos tamén enferman é unha crónica persoal onde Noriega relata o seu retorno ao mundo sanitario nestes anos precarios.
Escrito entre os anos 2021 e 2024, este libro permítenos descubrir directamente o sentir dun médico no duro contexto da sanidade pública nesta época da post-COVID, mais tamén está inspirado nas voces directas das propias persoas que escoita cada día na súa consulta de atención primaria.
“Reincorporeime á medicina ao comezo da pandemia, despois de moitos anos de sobreexposición pública”, afirma no limiar do libro, engadindo que “na Medicina de Familia reencontreime nos coidados coa palabra acompañar, co exercicio de escoitar e co innecesario de ter que opinar de todo a todas horas. Este feixe de historias naceron desa escoita atenta que pode ser parte da cura”.
