A poeta padronesa Inés Mosquera Calvo foi recoñecida co XXXVIII Premio de Poesía Eusebio Lorenzo Baleirón pola súa obra Upupú, presentada baixo o lema A ditadura da bubela. O fallo do xurado tivo lugar hoxe nun acto celebrado polo Concello de Dodro, entidade convocante do certame, coordinado pola poeta Silvia Penas.
O xurado, composto por María Lado Lariño, Noelia Gómez Calvo e Miguel Cavadas Docampo, xunto co alcalde e o concelleiro de Cultura de Dodro, escolleu por maioría a obra de Mosquera entre 42 candidaturas presentadas. Na acta destacouse a forza poética do texto, construído “entre o poema e o corpo dun paxaro”, cun estilo marcado pola linguaxe animal, a axilidade e o instinto. Upupú divídese en cinco partes e contén citas de poetas —maioritariamente mulleres— que acompañan a voz da autora nun voo lírico e rebelde.
A obra aborda temas como a dor, a enfermidade, a vergonza e a liberdade, cun ton desafiante e íntimo. “Lonxe de ser miña ruliña/ son bubela”, escribe Mosquera, quen reivindica o dereito a ser “mala muller, mala filla, mala amante”.
Nacida en Carcacía (Padrón) en 1992, Inés Mosquera é graduada en Educación Primaria e ten un mestrado en Lingüística Aplicada pola Universidade de Vigo. Actualmente traballa como tradutora e iniciou a súa traxectoria poética en 2022 coa publicación de Papulas Amarelas. En 2023 publicou Nonmesquezas e participou en volumes colectivos como Dorna ou Domingo das Mozas.
O
