Durante a noite do martes 18 de novembro, axentes de garda da Policía Local de Ribeira, recibiron aviso dunha posíbel condución baixo os efectos do alcol, por parte dunha persoa que se dispuña a coller o seu vehículo particular, no lugar de Bretal da parroquia de Olveira.
En resposta ao aviso, os axentes acudiron ao lugar e grazas á colaboración cidadá localizaron ao condutor, dándolle o alto. Lonxe de deterse, esta persoa emprendeu a fuxida ata chocar contra un muro de pedra, quedando encaixado sen posibilidade de continuar.
Os axentes explicaron que “o condutor presentaba claros signos de atoparse baixo a influencia do alcol, polo que foi requirido para realizar as probas de detección regulamentarias, arroxando unha taxa de delito”.
Por tales feitos deberá asistir o vindeiro martes 25 de novembro, como investigado por un posíbel delito contra a seguridade viaria, a un xuízo rápido, por superar a taxa obxectiva de 0,60 mg/l, a cal delimita a infracción administrativa da infracción penal, coa circunstancia agravante de emprender a fuxida, ignorando as sinais de detención dos axentes.
