A Asociación de Empresarios de Ribeira emitiu un comunicado no que convida a facer unha serie de ampliacións no programa MercaNaVila da Deputación da Coruña, destinado a favorecer as compras locais nos concellos de menos de 20.000 habitantes (con bonos de axudas descargábeis nos dispositivos da veciñanza). Sinalan que “estamos totalmente de acordo en que se poñan ao dispor do público este tipo de bonos polo que repercuten no desenvolvemento económico dos pequenos comercios”, pero sosteñen que debera eliminarse, precisamente, a limitación que a Deputación fixou respecto do número de habitantes das cidades.
Para a patronal de Ribeira (AER), “no caso da nosa cidade e como este, moito outros, ao darse a circunstancia de sobrepasar o número de habitantes non podemos beneficiarnos dos referidos bonos, pero ao dispoñer deles nas localidades limítrofes, como A Pobra do Caramiñal, Boiro e Porto do Son, e dada a proximidade destes concellos ao noso, provocou que moito cidadáns da nosa cidade se desprazaran a estes municipios para efectuar as súas compras en detrimento dos nosos comerciantes que durante uns días viron os seus establecementos baleiros, sen afluencia de clientes”.
En base ao devandito, a patronal solicita “que en caso de volver dar os bonos no futuro, ou ben sexan desenvolvidos sen limitación de habitantes, ou en caso contrario se consideran que deben ser para os concellos máis pequenos orquestren algunha medida para que unicamente poidan beneficiarse dos referidos bonos as persoas censadas neses municipios, desta maneira cumpriríase o obxectivo que queren alcanzar sen prexudicar aos municipios veciños de maior entidade”.
