Miguel Piqueras, coordinador do grupo local Unión de Cidadáns Independentes (UCIN), emitiu un comunicado no que critica a situación das instalacións deportivas do municipio, que, segundo di, “levan anos sen mantemento axeitado”.
E engade: “Os campos, e especialmente Vista Alegre, presentan céspede levantado, fochancas e superficies duras que están a provocar lesións continuas e graves entre xogadores de todas as idades, incluíndo máis de 400 nenos da escola de fútbol que utilizan a diario estas instalacións, así como equipos de veteranos e outros clubs locais”.
E apunta: “O estado do campo é indigno dun municipio como Boiro. Levamos anos advertindo do perigo e agora os xogadores están a mancarse gravemente mentres o Goberno local permanece inactivo”.
O coordinador critica ao Concello por, apunta, “promocionar novos campos mentres os existentes caen a pedazos. Para eles o deporte non é unha prioridade, senón un escaparate propagandístico”.
O coordinador do grupo local esixe “acción inmediata e responsabilidades políticas claras”, e engade que “resulta fundamental a renovación completa do céspede de Vista Alegre, a revisión e posta a piques de todas as instalacións deportivas do municipio, a implantación dun plan de mantemento permanente e supervisado, e a asunción de responsabilidades políticas polo deixamento acumulado durante anos”.
