O BNG de Outes, a través do voceiro Anxo Núñez, emitiu un comunicado no que demanda á Xunta que dote ao Centro de Saúde de Outes do persoal necesario e que non recorte máis servizos. Explican no comunicado que “a sanidade, competencia do Goberno da Xunta, leva anos padecendo as consecuencias dos recortes e a paulatina precarización do servizo a mans do Partido Popular, e en Outes xa nos recortaron pediatría e matrona, que agora só atenden unhas horas ou días á semana, e a partir de xaneiro pretenden pechar o centro de saúde os sábados”. Denuncian que a maiores de todo o devandito, “levamos semanas con persoal insuficiente xa que non cobren as baixas nin vacacións dos traballadores, nesta última semana só había 3 dos 6 médicos de cabeceira”.
A información coas declaracións de Anxo Núñez foi acompañada dun vídeo no que Sonia, veciña de Boel, explica os plans da Xunta de suprimir o servizo dos sábados no Centro de Saúde de Outes para centralizalo todo no PAC de Noia. Dende o BNG reclaman ao Goberno do PP os seguintes puntos:
-Que traballe con maior dilixencia para cubrir as vacacións e baixas do persoal.
-A reposición do servizo de matrona e pediatría a tempo completo e todos os días.
-Que se manteña a atención os sábados á mañá como até agora.
Por uns servizos públicos e de calidade!
