Após varios días de choiva, vento e algo de frío, desde este martes irase espallando e mesmo intensificando durante a semana, ese tempo que tan pouco nos cadra: o das xeadas e a masa fría -disque moi fría- que, procedente de latitudes altas, deixará temperaturas baixas para a época, máis propias do inverno.
Tanto as temperaturas máximas como as mínimas baixarán de xeito progresivo, segundo datos da Axencia Estatal de Meteoroloxía (AEMET), que afirma que as xeadas comezarán a partir deste martes e van espallarse e intensificando co avance da semana. Trátase dun “importante descenso térmico en todo o país” en amplas zonas do interior peninsular que provocarán xeadas na amencida e a primeiras horas da mañá. Un troco significativo no clima do noso país que ven para se quedar durante certo tempo.
O inverno vai chegando. mais nas vindeiras horas comezará a subir a velocidade coa que entra en territorio español. Desde este martes as temperaturas baixarán de xeito xeralizado en todo o país, con especial atención, porén, na metade norte da Península onde aínda se notará máis o descenso no mercurio.
Unha baixada das altas e baixas que ven producida por unha entrada de masa ártica desde o norte peninsular, acompañada dun fluxo húmido de gran percorrido marítimo que dará lugar a nevaradas na Cantábrica e Pirineos, cunha cota que descenderá ata os 800-1000 metros ao remate do día.
Este tempo irá a peor a partir do vindeiro xoves, pero sobre todo o venres. Esta masa de aire vai espallarse progresivamente ao resto da Península e Baleares, provocando un descenso térmico aínda maior.
Agárdase, polo tanto, que as temperaturas máximas se sitúen por baixo dos 10 graos centígrados en amplas zonas da península, agás o cuadrante suroeste e os litorais, onde serán lixeiramente superiores.
As cotas de neve serán baixas, se ben as nevaradas do xoves e o venres serán máis perceptíbeis no terzo norte. De xeito máis feble poderán espallarse ao resto do sistema montañoso da metade norte peninsular.
A partir do sábado, mellorarán as condicións atmosféricas pola entrada de aire atlántico máis cálido que devolverá as temperaturas, así como as súas máximas e mínimas, a un punto máis alto.
